رســـالة إلى المرحـــومة صــــابرين

فى زيارة سريعة منى الى مدينة الأشباح ، حيث تهيم روح المرحومة صابرين..
وبعد سلامى على كل العفاريت و(البعابيع) اللى فى المدافن ، وبحثى الطويل عن صابرين فى كل خرابة وسؤالى عنها لكل خفاش يتيم ، وجدتها أخيراً تلهو فى خمّارة (حاصد الأرواح) مع بعض الأشباح النونو..
المهم..

غمرتها بقبلاتى وهشتكتها وبشتكتها وعزمت عليها بسيجارة...آآآآ.. قصدى حاجة ساقعة ، وتوجهت اليها برسالتى..
من المعلمة (.......) الشريرة..
الشريرة جداً..
الشريرة أوى..
أوى أوى....

" من المعلّمة الى الروح الشفافة - المغفور لها – صابرين ، وحشتينا موت يا بنت الكلب ومش عارفين (قيادة التلاتة وتلاتين) من بعدك هاتشوف شغلها ازاى ، ده حتّى الحكومة كبست علينا من يومين واقنعناهم بالعافية انهم يسيبونا ووعدناهم اننا هانغير النشاط ، وبناء عليه قررنا نغير اسم الحركة من (قيادة التسعة وستين) إلى (قيادة التلاتة وتلاتين) زى مانتى شايفة ، طبعاً لأسباب أخلاقية ليس إلاّ ، وزى ما انتى عارفة عيال اليومين دول كلّهم فافى و....ولا بلاش عشان الرقابة ، يمسيهم بالخير الزباين السقع اللى كنتى بتجيبيهم أيام الشغل ، ومنى ليكى ألف سلامة ياروح امك وعقبال ما نأسس حزب جديد فى جمهورية الأموات العظمى يابنت الرفضى"

ملحوظة:
1- أبقى غطيها كويس عشان الشياطين اللى عندك عنيهم فارغة ، مش عارفة أنهى حمار اللى قال : ماعفريت الاّ بنى آدم..
2- يلعن أبوكى لأبو القيادة..
3- على فكرة ياحيلة امك الشغل ماشى بيكى وللا من غيرك ، بس حبينا نبين ان احنا مش قلالات الأصل زيك..
4- أنا نويت أبيعك وأتوب ، وهاطلع أحج .. أحج ج ج ج ج..
5- ياريت تكون الرسالة وصلت ، هىء هىء هىء..

المعلمة (...........)
أم (..........) سابقاً
سلميلى على الشياطين يا قطّة

المهم هى خلّصت من هنا وعينك ما تشوف الاّ النور ، قفزة شيطانية وأنياب ومخالب تسعى لتقطيعى إرباً..
- جرى ايه يابنت الصرمة هو انتى عليّا دنيا وآخرة؟!
- لأ يا عووووووووووووووووماااااااااااااااار ، ده انت اللى باين عليك ماشفتش وشى التااااانى..
- وربنا يابنت الحلـ.. آآآ الناس ، لو عليّا انا مش عايز أشوف خلقتك أصلاً..
- لأ.. كداب.. كداااااب.. أنت جى تاخد بتارك منى ، أنت اللى بلّغت عن المعلمة يابن الكلـ..
(طراااااخ) قفلت التابوت فى وشّها وحلفت يمين تلاتة مادخل أم الترب دى تانى ، واللى عايزنى أعزّى فيه يجيلى على البيت..

يا إما يستنى لما أموت وأجيله...

الدنيا دى ياناس دجالة
بتدّى الأمل للناس
فى الصبح والليل شغالة

وأمالنا مالهاش أى أساس

WARNING: Sabreen Might Kill You..