عزيزتى ولاء ، إنتى مش فاهمة غلط....

ياريت ماتعترضيش على نشرى للكلام ده هنا....

لأن تعداد سكان مصر 75 مليون بنى آدم ، ولو كل مليون فيهم واحدة اسمها ولاء يبقى فيه 74 ولاء غيرك ممكن تكون المقصودة بكلامى...

ماتخافيش ، ماحدش هايعرف أنا باتكلم على مين..

حبيت بس أقول لك إنا أنا اللى بعتلك الرابط من إيميل تانى بالفعل..

بتسألى ليه؟؟؟

أنا نفسى ماعرفش...

ممكن أكون مريض نفسياً...

ممكن أكون فاكر ان ده ذكاء وانك كده هاتنجذبى ليا أكتر...

وممكن يكون السبب - بدون تزييف أو تجميل - إنى حبيت إنك تضحكى شوية...

تجربى طعم جديد للضحك...

خدى بالك...

أنا لغاية اللحظة دى ماعرفش إذا كنتى ولاء ولا أسماء وللا صبحى وللا حسين..

فاكرة لما اتكلمنا أول مرة على الماسنجر وقلتلك إن مابقتش تفرق معايا ولد من بنت من شايب؟؟؟

أنا لما باتكلم ، باتكلم مع إنسان - Human Been - مش قالب طوب وللا خيارة وللا حتى كمبيوتر بيولوجى من بتوع فرنسا..

يعنى باتكلم مع كيان بيحس زيى بالزبط..

ويضحك..

ويبكى..

ويفرح..

ويتألم..

يغلط ويتأسف..

مش آلة......

يا ولاء أنا باكره الآلات...

باكره ان الناس تعيش زى الآلات الموجهة...

زى الآلة الحاسبة...

يعنى إيه 1+1=2 ؟؟؟

طيب لما يكون فيه اتنين بيحبوا بعض ( بجد مش حب هلس وأفلام) بيبقى ناتج 1+1 كام؟؟؟

مش عارفة؟؟؟

1+1=1

ولما الاتنين دول - حسب نظرية اللى بيقولوا ان الحب بيموت بعد الجواز - يتجوزوا ، مش ساعتها ممكن يبقو مجموع 1+1 يساوى 3 أو 4 أو مليون حتى؟؟؟؟

صدقينى الواقع الصلب العنيد والفيزياء والكيمياء مش هما أحلى حاجة فى الدنيا...

لازم الواحد من وقت للتانى يعمل حاجة نفسه فيها....

حتى لو هايمشى عريان فى الشارع..

أو يروح يعيط جنب أسدين قصر النيل..

المهم يفرغ الكبت اللى جواه...

ياريت تكونى فهمتينى ياااااااااااااااااااا ولاء....